Concertos Coruña42

Este domingo terá lugar a II edición da maratón Coruña42 e, como o ano pasado, instalaranse diversos puntos de animación ao longo do percorrido. En dous deses escenarios, 7 grupos usuarios dos Locais de Ensaio da Concellaría de Xuventude farán espertar á cidade coas súas actuacións, programadas entre as 09.00 e as 13.30 h. Ditos escenarios, finalmente, estarán situados no Cantón Pequeno (á altura do reloxo de froles) e en Catro Camiños (na praza da fábrica de tabacos).
Poderedes apoiar a estes grupos para un concurso vía Twitter escribindo #AnimaciónCoruña42ConcertosLocaisdensaio.
Os grupos que teredes oportunidade de ver serán:

After All: Grupo Coruñés de versións orixinais e temas propios, que din eles, son a @$¬%@!!.

Actuarán ás 09.40 h no escenario dos Cantóns, e ás 11.40 h no de 4 Camiños

Man City Blue: Tocan desde Iggy Pop até U2, creando así un estilo de rock variado e alternativo.

Actuarán ás 12.20 h no escenario dos Cantóns, e ás 11.00 h no de 4 Camiños

Ingravity: Ainda que o seu estilo non está totalmente definido, pouco a pouco van creando un  son propio entre o metal e o rock influenciados por grupos coma Tool ou A Perfect Circle.

Actuarán ás 09.00 h no escenario dos Cantóns, e ás 12.20 h no de 4 Camiños

Dharmak: Grupo Coruñés de Hard Rock estreando nova formación, voltan con máis forza que nunca.

Actuarán ás 13.00 h no escenario dos Cantóns, e ás 10.20 h no de 4 Camiños

Last Shot: Banda de random rock (para simplificar, indie-grunge-blues-punk-rock). Rebeldes, agudos, ácidos e sabrosóns, bastos a máis non dar e como cabras esquizofrénicas. Prometen convidar a chocolate con churros a quen máis lles grite.

Actuarán ás 11.40 h no escenario dos Cantóns, e ás 09.00 h no de 4 Camiños

Black Babylon: Grupo de hard rock de A Coruña con gañas de comer o mundo. Con influencias desde os clásicos Scorpions ou Motley Crue até o glam máis hortera como Quiet Riot, Twisted Sister ou Ratt. Se levas maias a todas horas e moves as guedellas a ritmo de rock, has flipar. Rock On.

Actuarán ás 10.20 h no escenario dos Cantóns, e ás 13.00 h no de 4 Camiños

Fading Memories: Grupo de heavy metal melódico de aquí, da Coruña. Tras coñecerse no instituto e ter tocado en varios grupos, tiñan pensado montar un grupo Punkarra, mais finalmente tiraron cara o metal tipo Bullet For My Valentine, A7X, Lamb of God, ...

Actuarán ás 11.00 h no escenario dos Cantóns, e ás 09.40 h no de 4 Camiños

Seguir lendo

Obradoiro de Saúde Musical (crónica)

Hoxe tivemos unha entretida e pedagóxica mañá de sábado, onde os asistentes aprenderon coidados básicos a realizar durante a actividade musical para previr lesións.

A ponencia realizada polas logopedas Marisol Caamaño e Silvia Vázquez explicou perfectamente como funciona o noso aparato fonador, e que debemos facer para conservalo en óptimas condicións. Falouse, entre outras cousas, de diferentes xeitos de quencer a voz, ou como non forzala .
Seguiu José Luís Aristín, presidente do Colexio Oficial de Fisioterapeutas de Galicia, fixo unha amena e precisa exposición para insistir nas posturas adecuadas mentres se fai uso dos instrumentos musicais, asimilando o esforzo co que fai calquer deportista, e lembrando a importancia dun bo quendemento.
Para finalizar, María Luaces ilustrounos sobre a importancia de coidar o aparato auditivo, e como o típico pasotismo de non tomar medidas cando nos expoñemos a altas presións sonoras pode afectar á nosa vida. Chamou, e moito, a atención como se demostrou coa axuda dun sonómetro a cantidade de veces que na vida cotiá nos expoñemos a niveis perigosos de ruido.

Foron dúas horas e media de moita utilidade para todos/as os/as asistentes, que agardamos comecen a facer caso dos consellos destes 4 profesionais que, desde os Locais de Ensaio da Concellaría de Xuventude, aproveitamos unha vez máis para agradecerlles a súa implicación no evento.

Seguir lendo

Obradoiro de Saúde Musical

O obradoiro de saúde musical nace como unha necesidade de achegar aos músicos da cidade consellos por parte de voces autorizadas para evitar futuras doenzas ou enfermidades debidas á actividade musical. Todo músico toca o seu instrumento porque ama a música, este evento está ideado para que esa relación dure o máximo posíbel, e non se curte prematuramente por non facer as cousas do xeito correcto.

Desde os Locais de Ensaio da Concellaría de Xuventude, queremos agradecer o apoio, fundamental neste evento, de Centro Gaes, o Colexio Profesional de Logopedas de Galicia, e o Colexio Oficial de Fisioterapeutas de Galicia, por colaborar nesta acción formativa. A prevención de perdas auditivas, tinnitus, nódulos nas cordas vocais, lumbalxias, artrites, contracturas e tendinites, entre outras lesións comúns no mundo da música, centrarán as ponencias a cargo de María Luaces, Silvia Vázquez, Marisol Caamaño e José Luís Aristín, respectivamente.

O obradoiro terá lugar na Sala O Túnel do Coliséum o sábado 6 de abril ás 11.00 h, tendo unha duración aproximada de 2 horas. Para poder asistir, unicamente compre cubrir o formulario de inscrición que atoparedes aquí, rematando o prazo de solicitude o venres 5 ás 21.00 h. Un e-mail á conta facilitada no formulario de inscrición confirmará a asistencia, sendo todo o proceso de balde.

Seguir lendo

I The Drum House - Meinl Day no Coliséum (crónica)

Espectacular. Con esa palabra podemos definir o que foi, e significou, o Festival do pasado sábado na pista central do Coliséum. Ao redor de 300 persoas achegáronse nunha horríbel tarde de inverno até a proposta que co-producían Meinl (MusicXsite), The Drum House, e Locais de Ensaio, dentro da proposta formativa para músicos que xa coñecedes.

Unha montaxe que dispoñía as 4 baterías a usar en ringleira, facilitando a visión desde calquer punto da grada, para non perder un só movemento, escoitándose cada matiz perfectamente en todo o recinto.

Colás Lage xogaba na casa, e ben que se notou. Comezou o festival da man dos seus músicos de confianza, demostrando a súa experiencia enriba do sillín.

Jairo Ubiaño demostrou un nivel de madurez difícil de chegar con só 23 anos. Casi tan boas as explicacións como a execución, dando unha masterclass moi participativa e da que todos/as sacaron algo en claro.

Juan Carlos Aizpún impresiona no 1º compás no que o ves tocar. Cunha pegada que facía tremer o Coliséum, molestouse en deixar claras as súas explicacións, e deixou á xente boquiaberta coa súa interprentación, tanto de temas de Koma, como algunha cousiña dos Meshuggah.

E para rematar... presentaban a Damien Schmitt coma un Extraterrestre. O certo é que é difícil atopar un músico tan detallista coma él (a meticulosidade coa que apretaba máis, ou menos, cada prata para según que pasaxe do tema que estaba a tocar, e como reflicten eses detalles ao seu son, un exemplo), xa que ademais é pianista, guitarrista, baixista e mesmo productor. Por non falar do dominio que ten nas cordas vocais (participante da última edición do programa "A Voz" en Francia). O caso é que sumerxíu ao público nas súas composicións (que verán a luz nos vindeiros meses en formato CD). Extraterrestre!!

Agardamos que todos/as os/as asistentes desfrutaran das 4 horas do evento na compaña destes 4 comprometidos, talentosos e simpáticos bateristas, e os que non puidéchedes asistir... non vos preocupedes!, falarase moito na cidade desa maravillosa tarde de inverno.

Seguir lendo

I The Drum House - Meinl Day no Coliséum

O 16 de marzo tedes unha cita ineludíbel para todos/as os/as amantes da música. En colaboración con Meinl e The Drum House, temos o gusto de presentarvos a Masterclass de batería definitiva, onde 4 artistazos das baquetas mostrarán o seu xeito de tocar o instrumento:

- Colás Lage. O Fenés comezará o evento mostrando a súa pericia na compaña de outros músicos.

- Jairo Ubiaño. Este Xixonés de só 23 anos fai uns meses estaba en California representando á Península Ibérica no I certame V-Drums Contest.

- Juan Carlos Aizpún. Baterista dos míticos Koma, poderedes desfrutar da súa experiencia e variedade de estilos.

- Damien Schmitt. Non vos dicimos máis, só que non vos podedes perder o espectáculo que vai dar este home. Ides flipar con este multi-instrumentista de orixe Francesa...

Serán máis de 4 horas de explicacións e demostracións que recomendamos a músicos de todos os estilos e instrumentos. Finalmente, e contradecindo ao cartaz do evento, terá lugar na pista do propio Coliséum da Coruña, non na Sala O Túnel.

Para poder asistir, poderedes apañar os convites (de balde) tanto en The Drum House (luns a venres de 16.30 a 21.00 h e martes a sábados de 10.00 a 14.00 h) e nos propios Locais de Ensaio da Concellaría de Xuventude (mércores a luns de 16.00 a 22.00 h e sábados e domingos de 11.00 a 14.00 h)*. Coma sempre neste tipo de eventos, prazas limitadas.

O propio día do evento accederase desde a porta 4 do Coliséum, entregando a invitación e presentando o DNI.

* Os días 9 e 15 de marzo os Locais de Ensaio non poderán abrir as súas portas.

Seguir lendo

Periodo de inscrición VI quenda

O luns, día 18, ábrese o prazo para presentar toda a documentación requirida para poder optar a participar na quenda de abril-setembro 2013 dos locais de ensaio:

- Solicitude debidamente cuberta. 

- Fotocopia dos DNI de todos/as os/as compoñentes do grupo. 

- Certificado de empadroamento de 2013 ou matrícula escolar do curso 2012/2013 de, cando menos, a metade do grupo. 

- Permiso paterno/materno/do titor ou titora legal de todas as persoas menores de idade e fotocopia do maior de idade que firma o permiso.

Os modelos de solicitude e permiso a menores atoparédelos neste mesmo blogue, ao igual que o regulamento a seguir.

Os únicos grupos exentos de facer esta solicitude son os que nestes intres compoñen a listaxe de agarda. 

A nova quenda dará comezo o luns 1 de abril.

Tedes até o venres 15 de marzo para achegardes toda a documentación requirida ao Centro Municipal de Información Xuvenil (Fórum Metropolitano: rúa Río Monelos, 1). As solicitudes recibidas a partires do 16 de marzo pasarán á listaxe de agarda dos locais de ensaio, notificando aos grupos integrantes as prazas libres para ensaiar, de habelas, por orde de entrega da solicitude.

Horario CMIX: Luns a venres de 10.00 a 14.00 e de 17.00 a 20.00 h e sábados de 11.00 a 14.00 h.

Calquer dúbida, podedes remitila a locaisdensaio@gmail.com.

Seguir lendo

995.318 grazas!!

Unha por cada gramo de comida acadado no III Festival En Directo, e que o Banco de Alimentos xa se encargou de repartir entre as asociacións ás que acoden os que máis precisan. Acabanos de chegar a confirmación da pesaxe oficial, por iso demoramos tanto a crónica dun festival onde cada un dos 13 grupos participantes defenderon o seu directo diante do seu público.

Tremebundos tiñan a difícil labor de comezar o festival. A súa mestura de boa música con letras picantes e simpáticas sorprendeu aos que ainda non os coñecían.

Man City Blue demostraron a súa melloría dos últimos meses a quenes xa os coñecían, xogando no directo coa dinámica que lles da a cantidade de referencias das que beben.

Con The Ice Road chegou o Hard-Rock ao festival. Actitude, temas propios e moito traballo... son os ingredentes para que as cousas saian ben. 

O Metalcore de Against The Utopian Dream montou os primeiros pogos na Sala O Túnel. 

Ollo aos 16 anos de idade da maioría dos compoñentes do grupo.

Un dos momentazos da tarde-noite foi escoitar a todo o público cantando "Mama mamucha dame o bocata". Gran actividade dos talentosos Tolemia enriba do escenario.

Uns clásicos nestes festivais, Dharmak, ensinaron os seus novos temas. O esforzo e traballo que puxeron no escenario non se pagan con todos os aprausos do mundo!

O Funk-Rock Chili-Pepperiano de Jules & The Wolf tiuvo boa acollida. 

Grupo a ter en conta, só levan 3 meses xuntos!

O show de After All nunca falta ao Festival En Directo.

A xente xa os coñece... e eles encantados!

Ingravity estrearon o seu novo nome, xunto con algunha canción de recente creación, demostrando as gañas que cada un dos integrantes pon para conseguir soar así.

A enerxía de Black Babylon cautivou a todos os presentes.

O xiro ao R&B de calidade de The Zipper foi das meirandes sorpresas da noite.

Semella que non hai Festival se non tocan Almakoa, que están a crear unha lexión de seguidores moi fiel.

Moonk deron o seu primeiro concerto, e foi impresionante ver á xente situada ao fronte do escenario con que concentración e devoción os arrouparon.

A esas 995318 grazas  habería que sumar 60 máis, unha por cada músico participante no evento, pola paixón que lle poñen a cada ensaio para poder dar o mellor de sí nos concertos e gravacións.

Nos Locais de Ensaio estamos comezando este 2013 con forza. Seguide o blogue para coñecer o que estamos a argallar para os vindeiros meses.

Seguir lendo